سينما و أدوار ...

و أهي دنيا سينما و أدوار والكل بياخد دوره فيها ، و بيمثله ، ولمّا بيعجبه بيصدقه .. و يبدأ يتحرك جواه ، لا ملامح و لا علامات بتوقف فن التمثيل.

فيه بيحب دور الجاني و الظالم و المفتري حتي لوكان بهيئة "فأر" و يلم مكسور مكسرهوش و يعالج مصايب وجرايم حتي مرتكبهاش بس الدور عاجبه ومريحه وأهي دنيا سينما وأدوار.

و فيه المجني عليه غلبان ، ضحية ! ، مفتري من جوه و "ثعبان"، عامل فيها بريء و حنين و سواد قلبه ملهوش أمان !

و كمان عندك  "فرقع لوز" طالع نازل زي اللوز ، لا تلاقي مبدأ ، لا تلاقي قيمة ، .. إمّعة .. محترف الترديد .. بغبغان يردد أي حاجة وف أي وقت و أي مكان ، معاهم تلاقيه ، عليهم تلاقيه زي الفل عليه ! و أهي دنيا سينما وأدوار.

خد عندك بقي عم المخلص ، رايح جاي يهربد فيك ! و في وشك جبروت بيقول " أنا بعمل كدة لمصلحتك.." و لا عمرك تفهم له كلام ، و لا عمرك تأمن له سلام ، ربك يستر من دي الأشكال !

و أهي دنيا سينما و أدوار و الكل بياخد دوره فيها وبيمثله ولما بيعجبه بيصدقه !

وسّع يا ابني لعم  "الشيخ" ذقنه طويله وقلبه كبير ، جلابيته بيضا وماشي للخير ..بس يا سيدنا ديننا عميق مبيترسمش ع الجدارن شكل حروف القرآن لكن بيتحفر في القلوب بالحب والرحمة ، بالإيجابية و العدل والمساواة ، بالمواطنة والإنسانية .. يا سيدنا ديننا دين حق مش إنتهازية ، دين خلق و إحترام.

فيه كمان مرهف الإحساس وقال قلبه بيبرق زي الماس .. هنا أشعار وهناك روايات و حكايات ! طول الوقت يبث أحزانه و أشواقه وينشرها علي كل كتاب من غير عنوان ، رخيص ومبتذل ، لا شعور و لا صدق ، موهوم بنظرات الناس ليه و إذا خاصم فجر و قهر ، بس سيبك أنت

"الله غالب". 

   عدّي معايا بقي علي عم الجامد، فاكر نفسه فولاذ لا يقهر ودموعه تنزل وقت الضحك ، أصله خانقها في أحزانه حرام تخرج ! ، قال أيه حصين لا سهام و لا حب و لا كلام من دة .. فوق يا ابني من أوهامك ، دة أنت بشر وربنا خلقك من ضعف و أهي دنيا سينما و أدوار !!

خد بالك بقي من أبو ضحكة صافية ، نظراته حلوة و عباراته أحلي ، بس وقت الجد متلاقيهوش ، ملح و ذايب وسط الزحمة ، حلو ميكملش و لا يسد ، مبدأه في الدنيا  " أنا معاك بس مش أوي " .

فيه كمان بقي بتاع نفسه ، نفرح آه .. نتكلم آه لكن أنا ومن بعدي مفيش ، الدنيا تقف علشاني وتتحرك كمان علشاني ، أبويا فين !؟ معرفش .. أمي فين !؟ مخدش بالي ، بس أنا موجود وعايش و هعيش و أهي دنيا سينما و أدوار.

أوعي يفوتك عم المشهور ، نجم ملألأ وسط النور ، فنان .. لعيب كورة .. تويبس يمكن م الطراز الثقيل ، فاكر دماغه ملهاش مثيل ، نبي يعني و أنزل عليك وحي ! ، و لا كلامك درر مينفعش نفوّته ، و كأنه " المتنبي ستايل " ناقص يقول لك  " و الخيل و الليل والبيداء و قناة السويس تعرفني " !! 

و أهي دنيا سينما وأدوار ... عدّي يا دنيا ولفي بينا ، خلّينا نتلاقي ف حكاوينا وأنزلي بينا علي أقرب تتر !!!