خاف و أقلق علي نفسك !

لما تبطل تحس بالناس من حواليك و متهتمش تبص لهم في عيونهم .. تبقي عندك مشكلة  ، لما تبطل تهتم بأقرب الناس ليك و تحاول تسعدهم  و تفرح قلوبهم.. يبقي في مشكلة ، لما تبطل تفكر في الحياة و ترتيب الأحداث كل يوم من حواليك  .. لسه في مشكلة ، و لما تبطل تحس بالرسائل الربانية و اللمسات الحانية و الهزّات القوية اللي ربنا بيبعتها لك، يبقي أكيد أنت غفلان .. و لما متمنعكش دمعة واحد حزين من الضحك أو السخرية يبقي خاف .. خاف و أقلق علي قلبك لأنه ساعتها يبقي قسي و نسي و تاه

لما ينقطع يقينك بالروحانيات و يضيع إيمانك بالغيبيات و متؤمنش غير بس بالماديات و الحاجات الملموسة يبقي خاف و أقلق علي نفسك .. لما يبقي يومك سريع و مشحون و مفيهوش و لا لحظة واحدة ناجيت فيها ملك الملوك بخاطرة نفسك .. يبقي

.. خاف ..

مضمون الحياة  واسع و محير بس ف عمق معانيها بنلاقي البساطة والخير والحق والرحمة.. ربنا خلقنا ببساطة عشان نعبده .. عشان نبقي الكلمات و المعاني الطيبة اللي خلقها - جل في علاه - في شكل كائنات متحركة علي أرضه .. منحنا بأحن و أرق هدية  "رسوله و نبيه و حبيبه" محمد صلي الله عليه و سلم ، لمّنا حواليه .. رقق قلوبنا و طهرها .. آخانا في الأسلام .. رفع الحواجز و القيود بين الأجناس و الألوان و الشعوب.

لما تبقي أنت الكائن الوحيد اللي بتفكر فيه .. فيا لشقائك !!

كل خطوة بناخدها في حياتنا بتبقي علي أمل الخطوة اللي بعدها و الدنيا حلقة و بتدور ...

و كل لحظة بنعيشها بتبقي علي أمل اللحظة اللي بعدها ..

و كل كلمة بنقولها بتبقي علي أمل ...

ربنا أمرنا بالتفكر في ملكوته .. بس الحياة بقت دلوقتي صعبة أوي و سريعة أوي و اللي يتجنن يوم و يقرر يطلع في مكان بعيد يعيش مع ربنا و يتفكر في حاله و حال الدنيا و حال الآخرة .. لازم يكون مستعد لتقبل الأبتسامات السخيفة و الكلمات الأكثر سخفا !

حاول بجد تلاقي وقت للتفكر و لو ساعة هتضحي بيها من وقت الفيس بوك .. حاول مرة تسترخي و تنسي إن الدنيا بتجري وراك بمتطلباتها .. حاول تخرج عن محيط نفسك للحظات و تقيّمها بشكل حقيقي و موضوعي ..  لو هتحترم حد يبقي أولي تحترم أبوك و أمك ، و لو هتخاف علي مشاعر حد يبقي أولي تخاف علي مشاعر إخواتك ، و لو هتحب حد يبقي أولي تحب اللي بيحبوك...

لو حابب تهتم بحاجة .. يبقي أولي تهتم بصحتك .. لو ضروري تشغل بالك  بتربية سمكة و لا بغبغان و لا حتي شجرة لبلاب  يبقي أولي تهتم بإطعام مسكين و لا بكفالة طفل محتاج لوجودك جنبه.

أشترك في نشاط الأخ الأكبر في جمعية رسالة و خلي طفل يتيم يفرح بزيارتك ليه كل أسبوع أو حتي كل شهر .. دور علي مسن لطيف و قرّب و أتعلّم منه .. شوف مشروع صغير و ساعد فيه و كبّره .. أطلع قوافل كتير و سافر كتير هتلاقي وقت للتفكر و وقت لعمل الخير و وقت للحياة

"في القوافل .. حياة للقلوب"

دوّر ع المهم بس .. و سيب اللي مش ضروري أوي هيجي لوحده ، أكيد في يوم هيلاقي له مكان في حياتك من نفسه !!!