النظارة

من مكتبة الحياة نأخذ علمنا الحقيقي وليس من الكتب و الأسفار ومن تجارب الأمس نصنع للمستقبل قواعده .. وفي أغوار نفس مظلمة ليس لها سقف و لا قاع ولا خريطة و لا معالم يغوص الإنسان ليكتشف نفسه ...

في يوم من الايام .. قرر واحد صاحبنا يشتري نظارة ممكن من خلالها يشوف الاشباح اللي بتطارده كل يوم في أحلامه وهوصاحي و هو نايم وبرغم خوفه الشديد من الاشباح والحاجات المفزعة اللي ممكن تعملها فيه إلا إنه قرر يواجهها وزي ما هي بتشوفه وبترعبه كل يوم ،لازم هو كمان يثبت لها إنه مش خايف وإنه شايفها ومستعد لضرباتها وخناقتها معاه وفعلا راح عشان يشتري النظارة الغالية المدهشة و اللي صاحبها قالّه :

" أول ما هتلبس النظارة هتختفي الأشباح من حياتك نهائيا ومش هترجع تشوفها تاني لا في أحلامك و لا وأنت صاحي وهتبقي حر .. تقدر تعمل كل حاجة من غير حساب للأشباح " 
، الراجل صاحبنا حس إن صاحب النظارة كذاب وبيضحك عليه و قال في نفسه :

 " يعني إزاي  !!؟ هو انا كنت بدفع فيها دم قلبي وحياتي عشان في الآخر مشفش الأشباح !!؟ أكيد الراجل دة كذاب والنظارة دي خدعة ومش بتقدر تكشف حاجة "

  فسأله : "طيب أنت هتستغني عنها ليه وإزاي هتقدر تواجه أشباحك من غيرها !؟" ، رد عليه الراجل :" أنا أتصالحت مع أشباحي خلاص وعملنا معاهدة سلام "، الراجل مقتنعش بكلام صاحب النظارة وسابه ومشي وهومروح هجم عليه شبح كبير وفضل يخربش في وشه ويضربه في كل حته في جسمه لحد ما الراجل جاب دم وأزرق وفضل يبص للناس حواليه إن حد ياخد باله و ينقذه !؟ ملقاش حد برغم إن كل الناس حواليه كانت لابسه النظارة اللي شبه نظارة الاشباح !! ،

فاستغرب الراجل إزاي هما لابسين النظارة وبرغم كدة محدش أنقذه من الشبح اللي هاجمه !!؟ فقرر يرجع وياخد النظارة من صاحبها وهو ساكت وفعلا لبس النظارة وحس بالقوة والسيطرة لأول مرة في حياته وشاف وحس الدنيا علي حقيقتها والغريب إن خرابيش وشه اختفت والضرب والزرقان راح من جسمه وقعد في إنتظار هجوم الشبح من جديد بس وقتها ملقاش حد !!.. قعد صاحبنا ع الطريق حيران من حاله وحال النظارة وقدرتها العجيبة ... هي ممكن تخفي الأشباح بجد!!؟ ومش كدة وبس .. لا دي خفت كل الأثار السلبية اللي عملتها الأشباح فيه !!! والأغرب إنه لما بص ع الناس وهو لابس النظارة لقاهم عاديين جدا و ماشيين في حياتهم ومش لابسين النظارة زي ما كان شايفهم  في الأول وكمان الأشباح مش بتؤذيهم ذيه !!!

يا تري أنت محتاج تصرف قد أية من عمرك عشان تعرف إن النظارة دي لا بتقدم و لا بتأخر وقناعاتك وحدها هي اللي هتطرد الأشباح !!؟

إحنا اللي بنعمل للأشباح وجود في حياتنا .. إحنا اللي بنخلقها و بنمكنها من مستقبلنا ، لو كل واحد خد قرار المواجهة مع مخاوفه وتحديات حياته هيلاقي الدنيا كلها ماشية معاه طواعية ، والنظارة دي مش أكتر من مجرد وهم زايف بنجري وراه ، و قناعاتك هي اللي بتدي للنظارة أهمية ولو أستوعبت الدنيا صح هتشوفها بالألوان  لعبة سهلة ومسلية و مش هتحتاج عمرك لنظارة ...