البصيرة

دايما بندعي ربنا ينوّر لنا بصيرتنا و نشوف و نعرف الحقايق و نتعامل معاها في وقتها بطريقة صحيحة .. لكن ده طبعا مش دايما بيحصل أو بالأحري نادرا ما بيحصل .. البني آدم دة بسيط أوي في مشاعره ، لكن غاية في التعقيد في أفكاره .. ربنا خلقنا مخلوقات بتحب .. بتكره .. بتثور .. بتخاف .. ب

 ...

و دايما بندور ع السعادة بمختلف مفاهيمها وسط البشر .. لكن إنك تعرف الحاجة شيء و إنك تتعامل معاها علي أرض الواقع شيء تاني خالص ، إنك تتعلم الصبر شيء و أنك فعلا تصبر ع البلاء و تجاهد نفسك بجد شيء تاني خالص.. كل بني آدم طبيعي بيجي له الوقت اللي بتضلم عليه كل حاجة في الدنيا و بيزهق من كل حاجة كان بيحبها و بتعمي عنيه عن كل حاجة حلوة قدامه .. بيبطل يحس بأي حاجة غير بالسواد و الخنقة و أحيانا كمان بتقلب معاه بطاقة سلبية ع اللي حواليه .. من الآخر بتبقي فوضي مشاعر وسكون ما قبل العاصفة

دي بتبقي لحظة القرب .. لحظة التنوير ودي كل ما مدتها بتزيد كل ما بيزيد ألم و ضجر كل واحد فينا لدرجة لا يعلمها إلا الله فهو _جل شأنه_ لا يكلف نفسا إلا وسعها بس أول ما بيوصل بيتشقلب الحال .. بيدخل جنة ربنا ع الأرض لما بيفهم ربنا عايز منه أيه !؟ و بيحس أد أيه ربنا عايزه يقرب له و يبعده عن الغفلة اللي كان فيها .. مش دايما بيقولوا ما تضيق إلا أما تفرج ! أهو دة اللي بيحصل بالضبط

اللي بيحصل إن قلوبنا بتتعلق بالدنيا بكل ما فيها بالأشياء بالأفراح بالبشر بحب نفسنا و بننسي إن في القرب من ربنا و الإحساس بمعيته و إستشعار رسائله الربانية في كل يوم هما بجد اللي فيهم فرحة و سعادة ما بعدها سعادة بس للي يفهم .. مش لازم تبقي بلحية طويلة عشان تبقي قريب من ربنا مش لازم تلبسي نقاب عشان تحسي بقرب ربنا .. أفتحوا بس قلوبكم و أدوا لنفسكم فرصة .. أصبروا شوية علي نفسكم .. لأن معاصي و ذنوب  شهور مش هتروح في يوم و ليلة

"و إنها لكبيرة إلا علي الخاشعين"

حبّوا نفسكم بس مش أوي .. أصبروا و صابروا و رابطوا .. أحسنوا الظن بالله بس كمان متأمنوش مكر ربنا فالله خير الماكرين

سامحوا الناس و أنسوا إسائتهم و بعد كدة أنسوهم .. جاهدوا نفسكم في الخير لأن الشيطان مبيسبش حد في حاله

فكّروا و تأملوا في الكون لأن الدنيا لما بتبقي من صنع ربنا بتبقي جميلة و أفتكروا إن مفيش حاجة كاملة و مفيش سعادة أبدية و كمان مفيش حزن دائم .. و متحاولوش تبقوا ملائكة عشان مش هتعرفوا .. أيوة مش هتعرفوا لأنكم لو ملايكة كان ربنا خلقكم ملايكة .. أنتم بشر من صنع الله الذي أحسن كل شيء صنعا و أفرحوا وفرّحوا قلوب اللي حواليكم

دوّروا ع الحاجات اللي بتحبوها و بتعرفوا تعملوها و شيلوا منها اللي بيغضب ربنا و طوروا فيها و أرجعوا حبوها تاني حبّوا متناقضات حياتكم فما أندر العادي و ما أكثر النادر في الحياة بس بشرط متبعدوش عن طريق ربنا و لو بعدتوا أرجعوا تاني بسرعة متزهقوش..بصوا للدنيا ببساطة هتبقي أحلي كتير..فرقّوا ما بين إننا نحب ربنا و نرضيه و ما بين أي خزعبلات ممكن يفرضها علينا أي مجتمع متخلف .. فكّروا في نفسكم و أحوالكم بس مش طول الوقت و سيبوا دايما بلوتوث قلوبكم مفتوح لرسائل ربنا

  و متحقدوش ع الناس المؤمنين أوي عشان ربنا يبارك لكم و جددوا الإيمان لأنه بيبلي زي الهدوم بالضبط

و لمّا كل واحد فينا يلاقي كل الردود و الإجابات علي كل الأسئلة اللي بتيجي في باله أو اللي بترميها له الدنيا في كل ثانية و كل ساعة و كل يوم .. ساعتها هيبقي أترزق بنور البصيرة بس خلّوا بالكم دة عامل زي فلاش الكاميرا بيجي و يروح .. وعشان كدة خلّوا دايما الكاميرا في وضع إستعداد و متقفلوش العدسة  !

"اللهم بصّرنا بمرادك منّا" و "لاتؤاخذنا إن نسينا أو أخطأنا"