كلام كتير مخنوق ملوش لا لغة و لا صوت
تقيل علي قلبي محسوس غير منطوق
مهاجرة بيه لوحدي في سكة خوف و هدوء
ثقل الحمل و مش قادرة بيه أعدي سور حدودي
أنا في الطريق براجع أحداث أيام بتعدي
و ع الحساب بشيل مشاعر تجيب و تودي
تايهه وسط الزحام لا قادرة أقول أنا أنا
و لا قادرة أقول أنا أتغيرت
و لا قادرة أقول أنا أتغيرت
واقفة علي الحدود
بيني و بين الزمن مصانع الحداد
شايفني واقفة مملة بدوّر ع اللا شيء
و شايفاه سريع غبي مضيّع مني لحظاتي
و سارق مني ضحكاتي
صابرة و صابر جوايا الحنين
ع الماضي نفسي أطلّ و أرجع بيه سنين
بتحرك لكن السكون معايا مصاحبني
بحاول أقول أي شيء يروحني لحياتي اللي مش لاقياها
تايهة و مش عارفه بتوه و لا بعود لسكة العارفين
فاضية و مش عارفة بأيه من المفاهيم
ممكن بيها أملاني
يمكن أكون مليانة علي أخري
وجوايا مهوش طايق كلام تاني
يمكن أكون ساكنة مدينة الأشباح و جواها مفيش غيري
خايفة و بدوّر ع البشر و أتاريني أنا الأشباح
عايشة و كأني في بروفة لحياة تانية بدوّر فيها ع الأبطال
حتي النجمة في السما طلّت علي مكاني
لا عرفتها و لا عرفتني
صبرت عليها يمكن تقولّي كلام أنا معرفوش
سكتت و قالت لأ خلص الكلام
معدش فيّا حاجة ممكن تلهمك و تطير بيكي لدنيا أحلامك
أنا هشّة و حكاياتي كبرتي عليها
أنا نجمة و القمر قدّامك
روحي و شوفيه يمكن يكون له كلام تاني
أنتي أنتي و الحياة قدّامك
غيّري ألوانك وارسمي بستانك
حرّكي العالم بقوة إيمانك
معاكي القمر منين راح تروحي هتلاقيه
وحده أسير الضلمة و الضلمة حمل عليه
لا عمر السواد غيّره و لا هربت منه النجوم
كوني البداية و الحلم و النسمة
عيشي الحياة كلمة ورا فكرة.
No comments:
Post a Comment