أية اللي خلّي المصريين يكتئبوا !؟

قبل ما أبدأ دراستي في الصيدلة كانت كل علاقتي بالمرض النفسي و أدويته لا تزيد عن مجرد شغف واحدة فضولية إنها تعرف أكتر عن النفس البشرية و دوافعها للفرح و الحزن ، للحب والكراهية ، للعطاء و الأنانية .. كنت فاكرة إن المرض النفسي دة شيء من الرفاهية ، يعني لمّا الناس تبقي فاضية ومتدلعة يبدأ يجيلها إكتئاب أو تحب نفسها بزيادة أو تبدأ تفكر في الإنعزالية ، كمان كنت فاكرة إن المرض النفسي زي الحب " للذين أكلوا و ليس للجائعين "، بمعني إن الأغنياء بس هما اللي من حقهم يعبروا عن نفسيتهم و يقولوا ع اللي جواهم بصوت عالي لدكتور و يدفعوا فلوس كمان عشان يلاقوا حد يسمعهم

كنت فاهمة إن المرضي النفسيين دول ناس قليلة في المجتمع .. ناس حساسة أتعرضت لمواقف قوية هزتها في حياتها فبدأ المخ يختل ، لكن الشغل والإحتكاك بالناس و بأدوية المرض النفسي أكدتلي مقولة عدت علي وداني بس أترسب صداها وفضل يرن كتير

 " ما أندر العادي والطبيعي وما أكثر النادر في هذة الدنيا "

و فوجئت بالواقع غريب لأبعد الحدود و لقيت إن السوق المصري للدواء فيه فوق المليون نوع دواء للأكتئاب و الزهايمر و الشلل الرعاش و إنفصام الشخصية و الجنون العادي و الجنون ثنائي القطب و العتة و الصرع والقلق و المهدئات ببدائلهم !!!

والأغرب إن الأدوية دي بتتصرف كثير و بشكل مستمر زي الأسبرين و المسكنات العادية ... إزاي واحد شكله عادي جدا يدخل يشتري علبة للشلل الرعاش ب 150جنية ولا علبة مضاد للأكتئاب ب 200 جنية فيها شريطين ولا 30 قرص !!؟

ممكن السعادة و الفرحة تتلخص في مجرد قرص دواء !!؟

و أية اللي خليّ المصريين يكتئبوا و لا ينسوا حياتهم و يأكل الزهايمر حكاياتهم و ذكرياتهم !!؟ أية اللي خليّ القلق و الأضطراب النفسي صديق دائم للأسرة!!؟

أية اللي يخلي بني أدم يصرف 700 جنية علي علبة فيها 28 قرص !!؟

أد كدة المرض النفسي بيوجع !!؟

أد كدة ألم الروح أقوي و أعنف من ألم الجسد !!؟

بالنسبة ليا 700 جنية دول يعملوا شوية حاجات لا بأس بها .. لكن أكيد مش هيبقي خياري الأول و أنا بنت الطبقة المتوسطة إني أشتري بيها zyprexa ...

أكيد لأ !!!

والطريف و المؤلم في نفس الوقت هو خفة دم المصريين و إختلافهم عن باقي الشعوب.. لأن كلمة مريض نفسي دي في بلدنا معناها عبيط أو مجنون  ، قرروا إن اللي يعالجهم أي دكتور تاني غير الدكتور النفساني و لاحظت إن الميل كان ل دكتور المخ و الأعصاب أسمه شكل حلو وبرستيج كمان.... أما بقي الدكاترة النفسيين نفسهم ف جالهم إكتئاب لعدم إعتراف الشعب المصري بيهم    ...

في النهاية أكتشفت إن المرض النفسي وليدة عوامل كثيرة منها العضوي ومنها النفسي .. كيميا الدماغ بتتغير بتغير حياتنا بتزيد مكونات و تقل مكونات ومعاها بنفرح و نحزن ، نخاف و نثور ، نكتئب و نهدي نعقل ونتهيبر و في الأخر دوام الحال من المحال

طبعا أنا مش بسأل ليه المصريين أكتئبوا عشان أعرف الإجابة .. لأني عارفة أية اللي تعبهم وحني ظهورهم و أرّق نومهم ..

أنا بس حبيت أقول إن ظاهرة صرف أدوية المرض النفسي بالكثافة دي.. زادت  والناس فعلا تعبانة و المرعب بجد إن بعضهم لسه مش عارف هو بياخد الأدوية دي ليه و فاكرها باسطة للعضلات ولا مقويات للأعصاب ... لسه فيه ناس مش عارفة إنها بتاخد مهدئات...

لسه في ناس مش عارفة إنها مكتئبة