عزيزي الضمير

 طالما إنك حيّ و صاحي أوي كدة .. يبقي يا تتنيل تنبهني قبل ما أعوك الدنيا .. يا تتنيل تسكت !

فين أصحابك الضماير اللي جوا باقي الناس حوالينا  .. ماتوا جواهم !؟ و لا أنت فريد من نوعك !؟

عزيزي الضمير .. حضرتك بتروح فين وتسبني لوحدي طول النهار .. ولا أنت بتحب ترغي معايا بليل بس عشان معرفش أنام  !؟

ليه مش بتقولي كلام حلو لما بعمل حاجة كويسة  .. ليه مش بتظهر غير في المصايب و الكوارث و الأخطاء و بس !؟

المثالية حلوة مفيش كلام  ... بس إحنا لسه ع الأرض و أنا بشر مش ملاك .. أنا كنت بهزر معاك  .. أنا بشر بيحب ملاك  ...

عزيزي الضمير .. سؤال : مين فينا الأقوي ؟  أنا و لا أنت  ؟

أنت مش  fair ..  أفتكر كدة أخر مرة جيت لحقتني قبل ما أغلط كان إمتي  !!؟

يعني مش بتشوف تصرفاتهم و غباوتهم معايا و لا أنت فالح بس تتشطر علي رد فعلي عليهم  !!؟

أوعي تزعل مني  .. أنا كنت بهزر معاك .. أنا أصلا مقدرش أعيش من غيرك .. بس خليك حنين و هبقي أشوفك بحاجة  ...

أمتي نتفق بقي  .. مش بتحب الشيكولاتة طيب !؟  ؛)

الضمير : خليكي متأكدة أنك مخلوقة ع الأرض عشان تغلطي ف تستغفري .. متخليش حد يفهمك انك ملاك مبتغلطيش و لا حد ييئسك ف تغلطي و متستغفريش  و علي فكرة أنا مش هسيبك و مبزعلش وراكي وراكي .. اه وكمان يا عزيزتي .. أنا مبحبش الشيكولاتة  !