ناس و ناس

في ناس بتوصل معاهم لدرجة من التواصل و التفاهم عالية أوي و بسرعة بدون أي مجهود .. بتبقوا زي ذراعين في محرك بيشتغلوا  بتناغم و مينفعش الدنيا تدور لو افترقوا ! ، الناس دي سهل تاخد دور كبير في حياتك و تساعدك تكتشف كتير في نفسك و تعرفها أكتر من خلالهم لأن الكيميا اللي بتنشأ بينكم بتخليك تطور من نفسك عشان تفضل ف إندماج مع إبداعاتهم وسهل تعتمد عليهم بس للأسف خذلان الناس دي  لينا لو حصل بيبقي في مقتل !! و فقدانهم كمان بيبقي صادم جدا جدا ...

و في ناس بتبقي تعاملاتك معاهم بحدود و مش مضطر تتعرف عليهم أو تقرب منهم مع إنهم ممكن يكونوا قريبين جدا ليك بعد كدة ... بتفضل علاقتك بيهم زي المطاط .. تقرب و تبعد حسب الحالة ... و الحالة دي ظروف شغل ، روتين حياة ، مزاج ليك أو ليهم أو حتي قضاء حاجة من حوائج الدنيا ! بس بتفضل مهما قربت عامل حساب إنك هتبعد و العكس .. بإختصار بيبقوا عوارض زمنية أو مكانية و بتروح لحالها بعد كدة !

و في ناس بتعرف من أول يوم تعامل معاهم إنهم لازقين فيك زي عملك الأسود أو مش شرط ممكن يبقي أبيض علي حسب الحالة !

بتبقي عارف إن حياتك أتقرنت بيهم و وجودك بقي مرتبط بوجودهم ، حاجة كدة زي تميمة الحظ الخاصة جدا بيك و برغم إنكم مش بالضرورة تكونوا متفاهمين إلا إنك فعلا متعرفش تعيش من غيرهم زي ما تكون أدمنت وجودهم .. يمكن لحاجة مميزة فيهم عن غيرهم بتحس إنهم بيكملوك أو بيرضوا جزء أساسي منك مينفعش تتخلي عنه ...

و في ناس بتحب تعرفهم من بعيد لبعيد لا يقربوا أوي ف يخبطوك و لا يبعدوا جامد فتنساهم ، ناس كدة قربهم ممكن يبعثر لك حياتك و يقلبها و يعمل زوبعة في فنجان من لا شيء بس كمان مينفعش تقفش عليهم و تزيلهم خالص من حياتك لأنهم ماضي بيعبر عنك  أكتر منهم مستقبل.. جايز بيفكروك بحالة كنت عليها زمان ! ... وجودهم ع الحال دة بيحقق لك بعض من الإتزان الداخلي في نفسك و عشان كدة جزء فيك بس هو اللي باقي عليهم  !

وفي ناس بتحب تحكي معاهم و تشكي لهم بأدق تفاصيلك من غير خوف و لا قلق .. عارف إنهم هيسمعوك و يفهموك .. ضعفك قدامهم مش عيب و بإنسانيتهم و قلوبهم الكبيرة بيؤسروك .. بتحس إنك مشدود لحنانهم و رقتهم معاك .. بتحس معاهم إنك طفل بريء بجد .. مطيع نفسه يفضل قريب من روحهم النقية ، ممكن تفضل ساكت ومستحمل أوضاع كتير و مع أول نظرة أو لمسه منهم بتنفجر منك أوجاعك لأنك بلا وعي عارف و متأكد إن الموقف معاهم تحت السيطرة و الغريب انهم ع الاغلب بيبقوا أغراب عنك يعني مش صله رحم مثلا ...

و في ناس علي قلبك كابسة و عمر ظهرك ما يصونوه .. دايما عارف إن سيرتك بين سنانهم لحم شهي و برغم دة كله لازم تتجاهل معرفتك بنفسيتهم المريضة و تتكيف علي التعامل معاهم بأقل الخسائر ... دول بتحب تسيبهم كدة تحت عنيك أفضل و مينفعش تواجههم .. كل المطلوب منك هو مراقبتهم من بعيد فحسب و عمرك ما تقدر تسيبهم غير و انت متأكد إنهم خارجين من حياتك و مش راجعين تاني بس عموما .. أطمئن ضررهم بيقل مع الوقت أو يمكن قوة تحملك لسخافاتهم هي اللي بتزيد !

و في ناس وسط الزحمة مبيبقاش عندك فرصة تعرفهم أقرب و يعرفوك و غصب عنّك بيشدّوك لحاجة فيهم هي ف الأصل فيك .. بتبقي عارف إن لو الظروف غير الظروف و الدنيا غير الدنيا كان ممكن تبقوا أصحاب قوي و كان ممكن يصونوك و يقدروك بس بينكم للأسف بتبقي في عوائق زمنية أحيانا مكانية و كتير إجتماعية  ، بتفضل دايما ف قلبك شايل لهم معزّة خاصة و تقدير أحيانا بيبقي غير مسبب .. محدش عارف انت ليه بتحبهم ؟ و لا رغم غرابتكم عن بعض بتحس إنك تعرفهم من غير حتي ما تتكلموا ...

و في ناس شايفاك حلو أوي و ملاك و أنت مش عارف ليه ... من وقت للتاني تلمح حالة الإنبهار بيك ف عيونهم ف تحس إنك و لا حاجة من اللي هما شايفينه عنك و ف نفس الوقت بتبقي عاوز تثبت لنفسك وتثبت لهم إنك حتي و لو ربع تخيلاتهم الراقية جدا عنك ، فتعاملهم بأحسن أحسن ما عندك و تعيش دور الملاك و تصدقه لحد ما يركبك بجد بمجرد ما تشوفهم بتتحول عن صدق لكائن تاني جميل همّا اللي صنعوه جوّاك ، دول علاقتك بيهم بتبقي دايما مصحوبة بمجهود .. مجهود كبير بتحاول فيه عن رضا إنك متخذلهمش ...

و في ناس تانية أنت ف نظرهم كلب البحر الواطي و عمرك ما هتنول رضاهم  و دة ع الأغلب بيبقي لأنك بتفكرهم بجوانبهم السلبية المظلمة ، كأنك دبوس و نازل ف نفوسهم المهترئة شكشكة ! همّا ف الحقيقة ميستهلوش إنك تحاول تغير نظرتهم فيك لأن غبائهم بيخليك تزهد فيهم و تحس ساعتها إن إساءة ظنهم فيك بتخليك تتأكد إن خداعهم مش حرام ! و بتفقد أي ذرة إنسانية أو ندم في التعامل معاهم .. دول البعد عنهم غنيمة ، لأنهم بيطلّعوا أسوء حاجة جواك وبيرجعوك لنقطة الصفر مع نفسك !!