أنا اللي لما واحدة صاحبتها تحب تاخد قرار مجنون وعارفة إن الكل هيعارضها فيه .. تكلمني وتاخد رأيي ونقعد سوا نفكر في المشاكل والحلول و أفضل أشجعها و أحمسها لحد ما توصل أو تلبس في الحيط ...
و أنا كمان نفس البنت هي هي اللي لما صحبتها الأنتيم تحب تسمع نصيحة عاقلة و متأنية تفكر فيّا علي طول وناخد سوا بالأسباب ونفكر في كل الأحتمالات والظروف و بعدين أسيبها تشق طريق رسمناه انا و هي ...
انا بقي اللي بتقدر يعني أية بنت في عز الحر لابسه إسدال و نقاب وتحته بنطلون جينز و فوقه جلباب واسع فضفاض و مهما شد الأذي و الحر ثابتة ..حرة صادقة في مبادئها و حبها لربنا .. أنا اللي بتشوف من ورا كل دة لسان حالها بيقول " يا رب .. كل دة لك لعلك ترضي "
و في نفس ذات الوقت .. أنا اللي بتحترم كل بنت لبسها عادي ومحتشم و مش محجبة .. أخلاقها السمحة عنوانها و أسلوبها الراقي منهج حياة !
أنا اللي إبتسامة صافية تنور يومها كله وتفرح قلبها أو يمكن نظرة هادية تريح بالها وتحسسها بالأمان .. و كمان أنا اللي كلمة هبلة تعفرتها وتطلع الجنان و لا لهجة تحدي تافهة تقلبها لكائن مفترس !
أصل أنا اللي دموعها بتنزل وقت الضحك والبكا فعشان كدة متستغربس لو عايزتعرف مين أنا ..
لو فعلا عايز تعرف مين أنا .. أنا فكرة و مبدأ و حكاية .. حرية أحيانا و ساعات جنان وساعات طفولة و سرحان في العشق و الجمال وكتير شرود و توهه في الملكوت ... حاجات كتير ملهاش علاقة ببعض ممكن تبقي .. أنا !
No comments:
Post a Comment