كل واحد فينا بيمثل عرض كامل مكتمل بالنسبة للناس حواليه و يا يقبلوك يا يرفضوك .. أنت عرض ، ضحكتك عرض ، نظرتك عرض ، قلبك عرض ، أفكارك عرض و حتي غضبتك عرض .. ساعات عرضك بيتقبل بس لأن مفيش عرض أضبط منه في التوقيت الحالي و لمّا بيظهر العرض المناسب بيعلّقوك لحين إشعار آخر وساعات بيتقبل حتي لو كان وحش لأن اللي قدامك شاف فيه إكتمال لبنود عرضه هو المجحفة ، زي إن يبقي عرضك ليهم إنك سلبي و عرضهم عنوانه حب السيطرة أو يبقي عرضك الجنون و عشق المحال و عرضهم واقعية و مثالية خانقة .
مهما حاولت تطور من نفسك ، من مميزاتك و تزود بنود مغرية في عرضك ليهم ممكن برضو يرفضوك لأن العرض مهما أكتمل ناقص ، هيفضل من صنعك ورقة قابلة للتغيير، في الوقت اللي هتلاقي ناس نفسها تخطفك مهما كان عرضك سيء من وجهه نظرك .. هي الحياة صفقات و عروض .. ناس بتقبل ، ناس بترفض و ناس بتفاوض !
المفاوضين دول شر الناس ، أوعي تسيب نفسك في دايرة التفاوض ، لأن اللي عاوزك هياخدك بكل بنودك المجحفة ، لأنه شايفك مكسب ليه حتي في قسوتك و خوفك ، قلبك و دمعتك ، غربتك حتي ، هيبقي شايفهم كلهم بتوعه و هو بس اللي هيعرف يطلع من قلبهم حياته الكاملة معاك ، عرضك طوّره لنفسك و متحاولش تحسّن فيه بشكل مزيف لأنك مهما نجحت هتفشل أو هتقابل عرض مزيّف زيّك و تتوهوا انتم الاتنين في الكذب اللي مزجتوه بالواقع .. و أوحش حاجة ف الدنيا لما تخلط حقيقة فيك بكذبة حبّيتها بس مش فيك بتخرج حاجة كدة هجينة لا هي أنت و لا تقدر تنكر إن مفهاش حاجة منّك !
كل أمّا كان عرضك بسيط ، كل أمّا كان سهل إنه يتفهم و سهل كمان إنه يتقبل أو يترفض ، و الرفض للعروض مش حاجة وحشة بالعكس دة دليل علي إن عرضك كان واضح و صريح ، التفاوض علي عرضك هو اللي ممكن يبقي وحاشة من إستغلالهم لمميزاتك دون عيوبك أو وحاشة من لوعك أنت اللي مكنتش واضح كفاية عشان ياخدوا قرارهم من ناحيتك .
لو عرضك قلبك الطيب و عرضهم سواد و حقد لازم يرفضوك
لو عرضك قوة و ذكاء و طموح و عرضهم استكانة و راحة و دعة لازم يرفضوك
لو عرضك حياة و جنون و مرح و عرضهم عجز و تخريف و كبر لازم يرفضوك
لو عرضك جبن و خسة و تردد و عرضهم علم و إيمان لازم يرفضوك
و لو عرضك فقر و بؤس و إهمال و عرضهم أصل و غني لازم يرفضوك !
ممكن عرض يعجبك و تبهرك بنوده بس مش ليك ، متحاولش تقرب منه أوي عشان متخسروش ، ممكن يناسبك كعرض صداقة لكن عرض جواز يجرحك و ممكن يناسبك عرض عمل لكن عرض أسرة و لمّة و عيلة يحبطك ، أقرا بنود العرض كويس و خد وقتك للفهم مش للتفاوض و خد البنود اللي تناسبك حتي لو هتبقي ابتسامته الطيبة و ابعد و متحاولش تغير في البنود اللي ممكن تؤذيك ، لأن كل عرض مهما كان طيب وجميل و له خطورته..
كل عرض و ليه مخاوفه و أوجاعه اللي خلفتها السنين فمتحاولش بأنانيتك تجرّده من نفسه عشان يناسبك ببنود مش فيه !
